ਕੈਟੇਗਰੀ

ਤੁਹਾਡੀ ਰਾਇ

New Directory Entries


ਪ੍ਰੇਸ ਰਿਲੀਜ਼ ਅਤੇ ਸਟੇਟਮੇੰਟ
ਕੀ ਪੱਤਰਕਾਰ ਬੀਬੀ ਤੋਂ ਡਰਦੇ ਨੇ ਪੰਜਾਬ ਦੇ ਵਜ਼ੀਰ ਤੇ ਸੱਤਾਧਾਰੀ ਨੇਤਾ ?
ਕੀ ਪੱਤਰਕਾਰ ਬੀਬੀ ਤੋਂ ਡਰਦੇ ਨੇ ਪੰਜਾਬ ਦੇ ਵਜ਼ੀਰ ਤੇ ਸੱਤਾਧਾਰੀ ਨੇਤਾ ?
Page Visitors: 12

ਕੀ ਪੱਤਰਕਾਰ ਬੀਬੀ ਤੋਂ ਡਰਦੇ ਨੇ ਪੰਜਾਬ ਦੇ ਵਜ਼ੀਰ ਤੇ ਸੱਤਾਧਾਰੀ ਨੇਤਾ ?
 ਵਜ਼ੀਰਾਂ ਹਨੇਰੇ 'ਚ ਕਿਓਂ ਰੱਖਿਆ ਖੈਹਰਾ ਵਿਰੋਧੀ ਮਤੇ ਤੋਂ ?
By : ਬਾਬੂਸ਼ਾਹੀ ਬਿਊਰੋ
Sunday, Dec 03, 2017 03:27 PM

       

 ਘੁਸਰ-ਮੁਸਰ
 ਬਾਬੂਸ਼ਾਹੀ ਬਿਊਰੋ
    ਇੱਕ ਸੀਨੀਅਰ ਵਜ਼ੀਰ ਨੇ ਸਾਫ਼ ਹੀ ਕਹਿ ਦਿੱਤਾ ਹੈ ਕਿ  ਬਹੁਤੀ ਗੱਲ ਕਰਨੋਂ ਉਹ ਇਸ ਕਰ ਕੇ ਗੁਰੇਜ਼ ਕਰਦਾ ਹੈ ਕਿ ਕਿਤੇ ਕੋਈ ਸਿਆਸੀ ਪੰਗਾ ਹੀ ਨਾ ਪੈ ਜਾਵੇ
    ਘਟਨਾ ਬਹੁਤ ਦਿਲਚਸਪ ਹੈ . ਵਿਧਾਨ ਸਭਾ ਵਿਚ ਇੱਕ ਅੰਗਰੇਜ਼ੀ ਅਖ਼ਬਾਰ ਦੀ ਸੀਨੀਅਰ ਅਤੇ ਬੀਬੀ ਇੱਕ ਸੀਨੀਅਰ ਵਜ਼ੀਰ ਤੋਂ ਕੁੱਝ ਜਾਣਕਾਰੀ ਲੈਣ ਪੁੱਜੀ . ਗੱਲ ਕਰਦੇ ਕਰਦੇ , ਉਸ ਨੇ ਸਵਾਲ ਕੀਤਾ ਕਿ " ਤੁਹਾਡੇ ਵਜ਼ੀਰਾਂ ਜਿਹੜਾ ਫ਼ੈਸਲਾ ਕੀਤਾ ਹੈ ਕਿ ਮੇਰੇ ਨਾਲ ਗੱਲ ਨਹੀਂ ਕਰਨੀ , ਇਸ ਵਿਚ ਤੁਸੀਂ ਵੀ ਸ਼ਾਮਲ ਹੋ ? " ਉਸ ਵਜ਼ੀਰ ਨੇ ਨਾਂਹ ਵਿਚ ਜਵਾਬ ਦਿੰਦੇ ਹੋਏ ਕਿਹਾ ਕਿ " ਮੈਂ ਤਾਂ ਗੱਲ ਕਰ ਰਿਹਾ ਹਾਂ ਦੇਖ ਲੋ ." ਪੱਤਰਕਾਰ ਬੀਬੀ ਨੇ ਕਿਹਾ ਕਿ ਉਸ ਨੂੰ ਸੱਤਾਧਾਰੀ ਆਗੂਆਂ ਤੋਂ ਹੀ ਸੂਹ ਮਿਲੀ ਹੈ ਕਿ ਵਜ਼ੀਰਾਂ ਨੇ ਇਹ ਸਾਂਝੀ ਰਾਏ ਬਣਾਈ ਹੈ ਕਿ ਉਸ ਬੀਬੀ ਨਾਲ ਗੱਲ ਨਾ ਕਰੋ ,ਉਸ ਨੇ ਤਾਂ ਪੁੱਠਾ ਹੀ ਲਿਖਣੈ . ਅੱਗੋਂ ਉਹ ਮੰਤਰੀ ਨੇ ਇਸ ਦਾ ਕੋਈ ਜਵਾਬ ਨਹੀਂ ਦਿੱਤਾ .
ਪਰ ਘੁਸਰ ਇਹੀ ਸੁਣੀ ਹੈ ਕਿ ਕਈ ਵਜ਼ੀਰ ਅਤੇ ਆਲ੍ਹਾ ਅਧਿਕਾਰੀ , ਉਸ ਸੰਜੀਦਾ ਅਤੇ ਪੜਚੋਲਵੀਂ ਕਲਮ ਵਾਲੀ ਪੱਤਰਕਾਰ ਬੀਬੀ ਨਾਲ ਗੱਲ ਕਰਨੋਂ ਭਾਵ ਉਸ ਦੇ ਸਵਾਲਾਂ ਦੇ ਜਵਾਬ ਦੇਣ ਤੋਂ ਕਤਰਾਉਂਦੇ ਨੇ . ਇਹ ਵੀ ਸੁਣਿਆ ਹੈ ਕਿ ਇੱਕ ਸੀਨੀਅਰ ਵਜ਼ੀਰ ਨੇ ਤਾਂ ਉਸ ਨੂੰ ਸਾਫ਼ ਹੀ ਕਹਿ ਦਿੱਤਾ ਹੈ ਕਿ ਉਹ ਉਸ ਨਾਲ ਬਹੁਤੀ ਗੱਲ ਕਰਨੋਂ ਇਸ ਕਰ ਕੇ ਗੁਰੇਜ਼ ਕਰਦਾ ਹੈ ਕਿ ਕਿਤੇ ਕੋਈ ਸਿਆਸੀ ਪੰਗਾ ਹੀ ਨਾ ਪੈ ਜਾਵੇ . ਲੋਹੜਾ ਤਾਂ ਇਹ ਹੈ ਪਿਛਲੀ ਬਾਦਲ ਸਰਕਾਰ ਦੌਰਾਨ ਜਦੋਂ ਉਹੀ ਮੀਡੀਆ ਕਰਮੀਂ ਸਮੇਂ ਦੀ ਸਰਕਾਰ ਅਤੇ ਹਾਕਮ ਅਕਾਲੀਆਂ ਬਾਰੇ ਘੋਖਵੀਂ ਪੜਚੋਲ ਵਾਲੀ ਕਵਰੇਜ ਕਰਦੀ ਸੀ ਤਾਂ ਉਦੋਂ ਇਹੀ ਕਾਂਗਰਸੀ ਨੇਤਾ ਉਸ ਦੇ ਬਹੁਤ ਪ੍ਰਸੰਸਕ ਹੁੰਦੇ ਸਨ .
    ------
    ਵਜ਼ੀਰਾਂ ਅਤੇ ਵਿਧਾਇਕਾਂ ਨੂੰ ਕਿਉਂ ਹਨੇਰੇ ਵਿਚ ਰੱਖਿਆ ਖਹਿਰਾ-ਵਿਰੋਧੀ ਮਤੇ ਬਾਰੇ ?
    ਇਸ  ਹਫ਼ਤੇ ਜਿਸ ਘਟਨਾਕ੍ਰਮ ਦੀ ਸਿਆਸੀ ਗਲਿਆਰਿਆਂ ਚ ਸਭ ਤੋਂ ਜ਼ਿਆਦਾ ਘੁਸਰ- ਮੁਸਰ ਹੋਈ, ਉਹ ਸੀ ਸੁਖਪਾਲ ਖਹਿਰਾ ਮਾਮਲੇ 'ਚ ਆਡੀਓ ਸਟਿੰਗ ਦੇ ਖ਼ਿਲਾਫ਼ ਲਿਆਂਦੇ ਮਤੇ ਦੀ । ਪੰਜਾਬ ਵਿਧਾਨ ਸਭਾ ਦੇ ਸਰਦ ਰੁੱਤ  ਸੈਸ਼ਨ ਦੇ ਆਖ਼ਰੀ ਦਿਨ ਦੇ ਆਖ਼ਰੀ ਪਲਾਂ ਵਿਚ ਵਿਚ ਇਹ  ਮਤਾ ਆਉਂਦੇ ਹੀ ਘੁਸਰ-ਮੁਸਰ ਸ਼ੁਰੂ ਹੋ ਗਈ ਸੀ, ਖ਼ਾਸਕਰ ਸੱਤਾਧਾਰੀ ਮੈਂਬਰ ਵੀ ਹੱਕੇ-ਬੱਕੇ ਰਹਿ ਗਏ । ਇਹ ਵੀ ਪਤਾ ਲੱਗਾ ਹੈ ਕਿ  ਸੰਸਦੀ ਮਾਮਲਿਆਂ ਬਾਰੇ ਮੰਤਰੀ ਬ੍ਰਹਮ ਮਹਿੰਦਰਾ ਦੇ ਨਾਲ ਸੀਟ ਤੇ ਬੈਠਣ ਵਾਲੇ ਤੇਜ਼-ਤਰਾਰ ਮੰਤਰੀ ਨਵਜੋਤ ਸਿੱਧੂ ਵੀ ਇਸ  ਮਤੇ ਬਾਰੇ ਅਣਜਾਣ ਸਨ ।
    ਮਤਾ ਆਉਣ ਤੋਂ ਬਾਅਦ ਕੁੱਝ ਦੇਰ ਤੱਕ ਤਾਂ ਕਿਸੇ ਨੂੰ ਸਮਝ ਈ ਨੀਂ ਆਈ ਕਿ ਆਖ਼ਿਰ ਵਾਪਰਿਆ ਕੀ? ਸਭ ਤੋਂ ਵੱਧ ਧੱਕਾ ਲੱਗਿਆ ਸੁਖਪਾਲ ਖਹਿਰਾ ਨੂੰ ਜੋ ਕੁੱਝ ਮਿੰਟ ਪਹਿਲਾਂ ਹੀ ਬ੍ਰਹਮ ਮਹਿੰਦਰਾ ਦੀ ਤਾਰੀਫ਼ ਕਰ ਕੇ ਹਟੇ ਸਨ । ਸਰਕਾਰ ਦੇ ਮੰਤਰੀਆਂ, ਵਿਧਾਇਕਾਂ ਤੇ ਅਫ਼ਸਰਸ਼ਾਹੀ 'ਚ ਹਾਲੇ ਤੱਕ ਇਸ  ਘੁਸਰ-ਮੁਸਰ ਚੱਲ ਰਹੀ ਹੈ ਕਿ “ ਇਸ  ਮਤੇ ਨੂੰ ਲਿਆਉਣ ਦੀ ਕੀ ਲੋੜ ਸੀ ?” ਇਹ ਕਿਸ ਦੀ ਸਕੀਮ ਸੀ ? ਇਹ ਭਾਣਾ ਅਚਾਨਕ ਕਿਵੇਂ ਵਾਪਰਿਆ ? ਕੀ ਇਸ ਮਤੇ ਨਾਲ ਜੁਡੀਸ਼ੀਅਰੀ ਦਾ ਵੀ ਕੋਈ ਸਬੰਧ ਸੀ ?
    ਇਨ੍ਹਾਂ ਸਵਾਲਾਂ ਦੇ ਜਵਾਬ ਤਾਂ ਸ਼ਾਇਦ ਸਮਾਂ ਹੀ ਦੇਵੇਗਾ ਪਰ ਮਤੇ ਤੋਂ ਤੁਰਤ ਪਹਿਲਾਂ ਜੋ ਕੁੱਝ ਹਾਊਸ ਵਿਚ ਵਾਪਰਿਆ ਸੀ , ਇਸ ਤੋਂ ਕੁੱਝ ਸੰਕੇਤ ਜ਼ਰੂਰ ਮਿਲਦੇ ਹਨ .
     ਵਿਧਾਨ ਸਭਾ ਚ ਜਿਸ ਵੇਲੇ ਆਡੀਓ ਮਾਮਲੇ ਚ ਨਿੰਦਾ ਮਤਾ ਆਇਆ ਇਹ ਵਕਤ ਸੀ ਜਦੋਂ  ਖਹਿਰਾ ਕੁੱਝ ਮਿੰਟ ਪਹਿਲਾਂ ਹੋਈ ਤਲਖ਼ੀ ਤੋਂ ਬਾਅਦ ਬ੍ਰਹਮ ਮਹਿੰਦਰਾ ਤੇ ਨਵਜੋਤ ਸਿੱਧੂ ਨਾਲ ਸੁਖਾਵਾਂ ਮਾਹੌਲ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਸਨ ਪਰ  ਉਨ੍ਹਾਂ ਦੇ ਸਾਹਮਣੇ ਬੈਂਚਾਂ ਤੇ ਕੁੱਝ ਹੋਰ ਈ ਘੁਸਰ-ਮੁਸਰ ਚੱਲ ਰਹੀ ਸੀ । ਮਤਾ ਆਉਣ ਤੋਂ ਕੁੱਝ ਸਮਾਂ ਪਹਿਲਾਂ ਐਡਵੋਕੇਟ ਜਨਰਲ ਪੰਜਾਬ ਅਤੁਲ ਨੰਦਾ ਸਦਨ ਚ ਆਏ. ਉਨ੍ਹਾਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਕੋਈ ਗੱਲ ਸਾਂਝੀ ਕੀਤੀ .
     ਕੁੱਝ ਮਿੰਟਾਂ ਬਾਅਦ ਮੁੱਖਮੰਤਰੀ ਸਦਨ ਚੋਂ ਉੱਠ ਕੇ ਬਾਹਰ ਗਏ, ਫਿਰ ਕੁੱਝ ਮਿੰਟਾਂ ਬਾਅਦ ਬ੍ਰਹਮ ਮਹਿੰਦਰਾ ਵੀ ਉੱਠ ਕੇ ਬਾਹਰ ਚਲੇ ਗਏ ਤੇ ਕਰੀਬ ਇਕ  ਘੰਟੇ ਬਾਅਦ ਸਦਨ ਚ ਉਹ , ਮੁੱਖਮੰਤਰੀ ਦੇ ਨਾਲ ਹੀ ਵਾਪਸ ਸਦਨ ਵਿਚ ਪਰਤੇ. ਇਸ ਤੋਂ ਕੁੱਝ ਪਲਾਂ ਬਾਅਦ ਹੀ ਚਰਚਿਤ ਨਿੰਦਾ ਮਤਾ ਸਦਨ ਚ ਪੜ੍ਹਿਆ ਗਿਆ । ਇਸ ਬਾਰੇ ਕੁੱਝ ਕਹਿਣਾ ਤਾਂ ਮੁਸ਼ਕਲ ਹੈ  ਕਿ ਉੱਪਰ ਜ਼ਿਕਰ ਕੀਤੇ ਘਟਨਾਕ੍ਰਮ ਨਾਲ ਮਤੇ ਦਾ ਕੋਈ ਸਬੰਧ ਸੀ ਜਾਂ ਨਹੀਂ  ਪਰ ਪ੍ਰਭਾਵ ਇਹੀ ਬਣਿਆ ਕਿ ਜੋ ਕੁੱਝ ਪਰਦੇ ਪਿੱਛੇ  ਹੋਇਆ ਉਹ ਮੁੱਖ ਮੰਤਰੀ , ਬ੍ਰਹਮ ਮਹਿੰਦਰਾ ਅਤੇ ਏ ਜੀ ਤੱਕ ਹੀ ਸੀਮਤ ਸੀ .
    ਇਹ ਵੀ ਸਵਾਲ ਉੱਠ ਰਹੇ ਨੇ ਕਿ ਵਿਧਾਨ ਸਭਾ ਦੀ ਅਜਿਹੀ ਕੋਈ ਰਵਾਇਤ ਹੈ ਕਿ ਸਦਨ ਵਿਚ ਮਤੇ ਰਾਹੀਂ ਹਾਈ ਕੋਰਟ ਨੂੰ ਕਿਸੇ ਅਜਿਹੇ ਮਾਮਲੇ ਦੀ ਸੁਓ ਮੋਟੋ ਜਾਂਚ ਲਈ ਬੇਨਤੀ ਕੀਤੀ ਗਈ ਹੋਵੇ ?
    ਅਕਾਲੀਆਂ ਦੀ ‘ਚੁੱਪ ਸਹਿਮਤੀ’
    ਵਿਧਾਨ ਸਭਾ ਵਿਚ  ਮਤਾ ਆਉਣ ਵੇਲੇ ਅਕਾਲੀ ਦਲ ਦੇ ਗਿਣੇ-ਚੁਣੇ ਵਿਧਾਇਕ ਹੀ ਅੰਦਰ ਸਨ ਤੇ ਵੱਡੇ ਬਾਦਲ, ਛੋਟੇ ਬਾਦਲ ਜਾਂ ਮਜੀਠੀਆ ਵਿਚੋਂ ਕੋਈ ਮੌਜੂਦ ਨਹੀਂ ਸੀ ਪਰ ਅਕਾਲੀ ਇਸ  ਮਤੇ 'ਤੇ ਇਕ  ਸ਼ਬਦ ਨੀਂ ਬੋਲੇ ਤੇ ਮਤਾ ਪਾਸ ਹੋਣ ਵੇਲੇ ਨਾਂ ਸਿਰਫ਼ ਸਦਨ ਦੇ ਅੰਦਰ ‘ਚੁੱਪ ਸਹਿਮਤੀ’ ਦਿੱਤੀ ਬਲਕਿ ਬਾਹਰ ਵੀ ਇਹੀ ਘੁਸਰ-ਮੁਸਰ ਸੁਣਾਈ ਦਿੰਦੀ ਹੈ  ਕਿ ਮਤੇ ਨਾਲ  ਅਕਾਲੀਆਂ ਦੀ ‘ਚੁੱਪ ਸਹਿਮਤੀ’ ਸਪਸ਼ਟ ਵਿਖਾਈ ਦੇ ਰਹੀ ਹੈ ।
 

©2012 & Designed by: Real Virtual Technologies
Disclaimer: thekhalsa.org does not necessarily endorse the views and opinions voiced in the news / articles / audios / videos or any other contents published on www.thekhalsa.org and cannot be held responsible for their views.