* ਰੋਬੋਟ ਮੂਲਰ ਸਾਹਮਣੇ ਹੋਣਗੇ ਪੇਸ਼
ਵਾਸ਼ਿੰਗਟਨ, 19 ਜਨਵਰੀ (ਪੰਜਾਬ ਮੇਲ)-ਵ੍ਹਾਈਟ ਹਾਊਸ ਦੇ ਸਾਬਕਾ ਰਣਨੀਤੀਕਾਰ ਸਟੀਵ ਬੈਨਨ ਅਮਰੀਕੀ ਚੋਣਾਂ ‘ਚ ਰੂਸੀ ਦਖ਼ਲ ਮਾਮਲਿਆਂ ‘ਚ ਪੁੱਛਗਿੱਛ ਲਈ ਰਾਜ਼ੀ ਹੋ ਗਏ ਹਨ। ਉਨ੍ਹਾਂ ਨੇ ਗਰੈਂਡ ਜਿਊਰੀ ਦੀ ਜਗ੍ਹਾ ਵਿਸ਼ੇਸ਼ ਵਕੀਲ ਰੋਬੋਟ ਮੂਲਰ ਦੇ ਜਾਂਚਕਰਤਾਵਾਂ ਸਾਹਮਣੇ ਪੇਸ਼ ਹੋਣ ਦੀ ਹਾਮੀ ਭਰ ਦਿੱਤੀ ਹੈ। ਮੂਲਰ 2016 ‘ਚ ਹੋਈ ਅਮਰੀਕੀ ਰਾਸ਼ਟਰਪਤੀ ਚੋਣ ‘ਚ ਰੂਸ ਦੀ ਦਖ਼ਲ ਸੰਬੰਧੀ ਦੋਸ਼ਾਂ ਦੀ ਜਾਂਚ ਕਰ ਰਹੇ ਹਨ। ਚੋਣਾਂ ‘ਚ ਬੈਨਨ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਨਜ਼ਦੀਕੀ ਸਲਾਹਕਾਰ ਸਨ।
ਸੂਤਰਾਂ ਅਨੁਸਾਰ ਮੂਲਰ ਨੇ ਬੈਨਨ ਨੂੰ ਪੁੱਛਗਿੱਛ ਦਾ ਇਹ ਬਦਲ ਦਿੱਤਾ ਜਿਸ ਨੂੰ ਬੈਨਨ ਨੇ ਸਵੀਕਾਰ ਕਰ ਲਿਆ ਸੀ ਪਰ ਅਜੇ ਇਹ ਸਾਫ਼ ਨਹੀਂ ਹੋ ਸਕਿਆ ਕਿ ਪੁੱਛਗਿੱਛ ਕਦੋਂ ਹੋਵੇਗੀ? ਇਸ ਪੁੱਛਗਿੱਛ ਦੌਰਾਨ ਬੈਨਨ ਨੂੰ ਆਪਣੇ ਨਾਲ ਇਕ ਵਕੀਲ ਰੱਖਣ ਦੀ ਰਾਹਤ ਮਿਲੇਗੀ ਜਦਕਿ ਗਰੈਂਡ ਜਿਊਰੀ ‘ਚ ਇਸ ਦੀ ਆਗਿਆ ਨਹੀਂ ਹੈ। ਬੈਨਨ ਨੂੰ ਪਿਛਲੇ ਸਾਲ ਜਨਵਰੀ ‘ਚ ਵ੍ਹਾਈਟ ਹਾਊਸ ‘ਚ ਮੁੱਖ ਰਣਨੀਤੀਕਾਰ ਦੇ ਤੌਰ ‘ਤੇ ਨਿਯੁਕਤ ਕੀਤਾ ਗਿਆ ਸੀ। ਅਗਸਤ ‘ਚ ਹਾਲਾਂਕਿ ਉਸ ਨੂੰ ਇਸ ਅਹੁਦੇ ਤੋਂ ਹਟਾ ਦਿੱਤਾ ਸੀ। ਰਾਸ਼ਟਰਪਤੀ ਚੋਣਾਂ ਵਿਚ ਰੂਸੀ ਦਖ਼ਲ ਮਾਮਲਿਆਂ ਦੀ ਮੂਲਰ ਦੇ ਇਲਾਵਾ ਸੰਸਦ ਦੀਆਂ ਕਈ ਕਮੇਟੀਆਂ ਵੀ ਜਾਂਚ ਕਰ ਰਹੀਆਂ ਹਨ।
ਸੰਸਦੀ ਕਮੇਟੀ ਦੇ ਸਾਹਮਣੇ ਪੇਸ਼ ਹੋਏ ਟਰੰਪ ਦੇ ਦੋ ਸਹਿਯੋਗੀ
ਟਰੰਪ ਦੇ ਦੋ ਹੋਰ ਸਹਿਯੋਗੀ ਵ੍ਹਾਈਟ ਹਾਊਸ ਦੇ ਡਿਪਟੀ ਚੀਫ਼ ਆਫ਼ ਸਟਾਫ਼ ਰਿਕ ਡਿਅਰਬ੍ਰਨ ਅਤੇ ਸਾਬਕਾ ਚੋਣ ਪ੍ਰਬੰਧਕ ਕੋਰੀ ਲੇਵੰਡੋਵਸਕੀ ਰੂਸੀ ਦਖ਼ਲ ਮਾਮਲਿਆਂ ਦੀ ਜਾਂਚ ਕਰ ਰਹੀ ਸਦਨ ਦੀ ਗੁਪਤ ਮਾਮਲਿਆਂ ਦੀ ਇਕ ਕਮੇਟੀ ਦੇ ਸਾਹਮਣੇ ਪੇਸ਼ ਹੋਏ।