ਆਪ ਪਾਰਟੀ ਦੇ ਬਾਗੀਆਂ ਦੇ ‘ਸਵਰਾਜ ਅਭਿਆਨ’ ਦੇ ਮੁਖੀ ਬਣੇ ਆਨੰਦ ਕੁਮਾਰ
ਨਵੀਂ ਦਿੱਲੀ, 16 ਅਪਰੈਲ (ਪੰਜਾਬ ਮੇਲ)-ਆਮ ਆਦਮੀ ਪਾਰਟੀ (ਆਪ) ਤੋਂ ਵੱਖ ਹੋਏ ਬਾਗੀ ਧੜੇ ਨੇ ਆਪਣੇ ਮੋਰਚੇ ‘ਸਵਰਾਜ ਅਭਿਆਨ’ ਦਾ ਕੱਲ੍ਹ ਰਸਮੀ ਐਲਾਨ ਕਰ ਦਿੱਤਾ। ਯੋਗਿੰਦਰ ਯਾਦਵ ਨੇ ਨਵੇਂ ਗੁੱਟ ਦੇ ਰਾਸ਼ਟਰੀ ਕਨਵੀਨਰ ਦੇ ਤੌਰ ‘ਤੇ ਪ੍ਰੋ. ਆਨੰਦ ਕੁਮਾਰ ਦੇ ਨਾਂ ਦਾ ਐਲਾਨ ਕਰ ਦਿੱਤਾ। ਇਸੇ ਤਰ੍ਹਾਂ ਆਪ ਪਾਰਟੀ ਦੀ ਰਾਸ਼ਟਰੀ ਕਾਰਜਕਾਰਨੀ ਤੋਂ ਕੱਢੇ ਗਏ ਸਾਰੇ ਸੱਤ ਮੈਂਬਰ ਅਤੇ ਦਿੱਲੀ ਦੇ ਮੌਜੂਦਾ ਵਿਧਾਇਕ ਪੰਕਜ ਪੁਸ਼ਕਰ ਨੂੰ ਲੈ ਕੇ ਇਸ ਦੀ ਕੰਮ ਚਲਾਊ ਕਾਰਜਕਾਰਨੀ ਬਣਾਈ ਗਈ ਹੈ।
ਪ੍ਰਸ਼ਾਂਤ ਭੂਸ਼ਣ ਨੇ ਭਵਿੱਖ ਦੀ ਰਣਨੀਤੀ ਬਾਰੇ ਸਾਫ ਕਿਹਾ ਕਿ ਹਾਲੇ ਇਹ ਨਾ ਤਾਂ ਪਾਰਟੀ ਹੈ ਅਤੇ ਨਾ ਹੀ ਗੈਰ ਸਰਕਾਰੀ ਸੰਸਥਾ (ਐਨ ਜੀ ਓ), ਪਰ ਅੱਗੇ ਚੱਲ ਕੇ ਇਹ ਸਿਆਸੀ ਪਾਰਟੀ ਦੀ ਭੂਮਿਕਾ ਵਿੱਚ ਆ ਸਕਦਾ ਹੈ। ਇਸ ਤੋਂ ਪਹਿਲੇ ਇਹ ਯਕੀਨੀ ਬਣਾ ਲਿਆ ਜਾਵੇਗਾ ਕਿ ਦੇਸ਼ ਭਰ ਤੋਂ ਇਹ ਸਮਰਥਨ ਵਾਪਸ ਜੁਟਾਉਣ ਵਿਚ ਸਫਲ ਹੈ ਅਤੇ ਨਾਲ ਹੀ ਸੰਗਠਨ ਉਨ੍ਹਾਂ ਸਿਧਾਂਤਾਂ ਨੂੰ ਅਪਣਾਉਣ ‘ਚ ਸਫਲ ਹੈ, ਜਿਨ੍ਹਾਂ ਦੀ ਅਸੀਂ ਗੱਲ ਕਰਦੇ ਰਹੇ ਹਾਂ। ਯੋਗਿੰਦਰ ਯਾਦਵ ਨੇ ਦੱਸਿਆ ਕਿ ਅਭਿਆਨ ਦੇ ਨੇਤਾ ਦੇਸ਼ ਵਿੱਚ ਸਵਰਾਜ ਅਭਿਆਨ ਯਾਤਰਾ ਕੱਢਣਗੇ, ਜੋ ਦੇਸ਼ ਦੇ ਲਗਭਗ ਸਾਰੇ ਜ਼ਿਲਿਆਂ ਵਿੱਚ ਜਾਵੇਗੀ। ਇਸੇ ਤਰ੍ਹਾਂ ਸਾਰੇ ਰਾਜਾਂ ਵਿੱਚ ਸਵਰਾਜ ਸੰਵਾਦ ਕਰਵਾਏ ਜਾਣਗੇ।