ਸ਼੍ਰੋਮਣੀ ਕਮੇਟੀ ਵਿਚੋਂ ਬਾਦਲ ਨੁੰ ਭਜਾਉਣ ਦਾ ਉੱਦਮ ਜਾਂ 
     ਸ਼੍ਰੋਮਣੀ ਕਮੇਟੀ ਫਿਰ ਬਾਦਲ ਦੇ ਹਵਾਲੇ ਕਰਨ ਦਾ ਉਪਰਾਲਾ
          ਸਤਿਕਾਰ ਯੋਗ ਪ੍ਰਿੰ. ਪਰਵਿੰਦਰ ਸਿੰਘ ਖਾਲਸਾ ਜੀ ਦਾ ਬਿਆਨ ਪੜ੍ਹਨ ਨੂੰ ਮਿਲਿਆ , ਕਿ ਉਨ੍ਹਾਂ ਦੀ ਸੰਸਥਾ ' ਸ਼੍ਰੋਮਣੀ ਗੁਰਮਤਿ ਚੇਤਨਾ ' ਵਲੋਂ ਆਉਣ ਵਾਲੀਆਂ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਵਿਚਲੇ  ੧੭੦  ਹਲਕਿਆਂ ਵਿਚ ਆਪਣੇ ਉਮੀਦਵਾਰ ਖੜੇ ਕਰੈਗੀ । ਉਨ੍ਹਾਂ ਦੇ ਬਿਆਨ ਵਿਚ ਤਾਂ ਇਹ ਕਿਹਾ ਗਿਆ ਹੈ ਕਿ ਇਵੇਂ ਉਹ ਬਾਦਲ ਨੂੰ ਸ਼੍ਰੋਮਣੀ ਕਮੇਟੀ ਵਿਚੋਂ ਭਜਾਉਣਗੇ , ਪਰ ਉਨ੍ਹਾਂ ਦਾ ਇਹ ਕੰਮ , ਉਨ੍ਹਾਂ ਦੇ ਬਿਆਨ ਨਾਲ ਮੇਲ ਨਹੀਂ ਖਾਂਦਾ । ਜੇ ਦੋ ਸੰਸਥਾਵਾਂ ਵੀ ਹੋਰ ਅਜਿਹੇ ਬਿਆਨ ਨਾਲ ਮੈਦਾਨ ਵਿਚ ਨਿੱਤਰ ਆਉਣ ਤਾਂ , ਯਕੀਨਨ ਬਾਦਲ ਨੂੰ ਸ਼੍ਰੋਮਣੀ ਕਮੇਟੀ ਵਿਚੋਂ ਕੋਈ ਨਹੀਂ ਕੱਢ ਸਕੇਗਾ ।  
  ਮੇਰੀ ਸਮਝ ਵਿਚ ਇਹ ਗੱਲ ਵੀ ਨਹੀਂ ਆਈ ਕਿ ਪ੍ਰਿੰ , ਸਾਹਿਬ ਨੂੰ ਪੰਜਾਬ (ਹਰਿਆਣਾ+ ਹਿਮਾਚਲ) ਵਿਚਲੇ ਗੁਰ ਸਿੱਖਾਂ ਨਾਲ ਕੋਈ ਵੀ ਵਿਚਾਰ ਵਟਾਂਦਰਾ ਕੀਤੇ ਬਗੈਰ , ਅਜਿਹਾ ਬਿਆਨ ਦੇਣ ਦੀ ਏਨੀ ਕਾਹਲੀ ਕੀ ਸੀ ? ਪਿਛਲੀ ਵਾਰ ਜਦੋਂ ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਹੋਈਆਂ ਸਨ , ਤਾਂ ਕੀ ਪ੍ਰਿੰਸੀਪਲ ਸਾਹਿਬ ਪੰਜਾਬ ਵਿਚ ਨਹੀਂ ਸਨ ? ਜੇ ਸਨ ਤਾਂ ਉਨ੍ਹਾਂ ਨੇ ਬਾਦਲ ਨੂੰ ਕਿੰਨਾ ਕੁ ਭਜਾਇਆ ਸੀ ?
 ਪ੍ਰਿੰਸੀਪਲ ਸਾਹਿਬ ਅੱਗੇ ਏਨੀ ਕੁ ਹੀ ਬੇਨਤੀ ਹੈ ਕਿ , ਪੰਜਾਬ ਵਿਚ ਬਾਦਲ ਵਿਰੁੱਧ ਬਣੇ ਮਾਹੌਲ ਨੂੰ , ਸਿੱਖਾਂ ਵਿਚ ਵੰਡੀਆਂ ਪਾ ਕੇ ਖਰਾਬ ਨਾ ਕਰੋ । ਸਾਰੇ ਗੁਰਸਿੱਖ ਮਿਲ ਕੇ ਕੋਈ ਸੁਚੱਜਾ ਪ੍ਰੋਗਰਾਮ ਉਲੀਕੋ , ਜਿਸ ਨਾਲ ਬਾਦਲ ਦੇ ਹਰ ਉਮੀਦਵਾਰ ਦੇ ਮੁਕਾਬਲੇ ਤੇ , ਇਕ ਹੀ ਉਮੀਦਵਾਰ ਖੜਾ ਕੀਤਾ ਜਾਵੇ ।
  ਵੈਸੇ ਮੈਂ ਜਾਣਦਾ ਹਾਂ ਕਿ ਪੰਜਾਬ ਵਿਚਲੇ   ੧੪-੧੫   ਅਕਾਲੀ-ਦਲ , ਅਜਿਹੇ ਮੌਕਿਆਂ ਤੇ ਆਪਣੇ ਉਮੀਦਵਾਰ ਖੜੇ ਕਰ ਕੇ , ਬਾਦਲ ਦੀਆਂ ਵਿਰੋਧੀ ਵੋਟਾਂ ਵੰਡ ਕੇ ਬਾਦਲ ਸਾਹਿਬ ਦੀ ਖੂਬ ਸੇਵਾ ਕਰਦੇ ਹਨ । ਜਿਸ ਦੇ ਮੁਆਵਜ਼ੇ ਵਜੋਂ ਬਾਦਲ ਉਨ੍ਹਾਂ ਦਾ ਸ਼ੁਕਰਾਨਾ ਕਿਵੇਂ ਕਰਦਾ ਹੈ ? ਇਹ ਗੱਲ ਬਾਦਲ ਜਾਂ ਉਹ ਅਕਾਲੀ ਦਲ ਹੀ ਭਲੀ-ਭਾਂਤ ਜਾਣਦੇ ਹਨ ।
  ਪਰ ਪ੍ਰਿੰ . ਪਰਵਿੰਦਰ ਸਿੰਘ ਖਾਲਸਾ ਤੋਂ ਐਸੀ ਉਮੀਦ ਨਹੀਂ । ਪ੍ਰਿੰ , ਸਾਹਿਬ ਦਾ ਟੀਚਾ ਕੀ ਹੈ ? ਇਹ ਤਾਂ ਉਹ ਹੀ ਜਾਣਦੇ ਹਨ , ਪਰ ਜਿਸ ਲੀਹ ਤੇ ਚੱਲ ਕੇ ਉਹ ਬਾਦਲ ਨੂੰ ਭਜਾਉਣ ਦੀ ਗੱਲ ਕਰਦੇ ਹਨ , ਉਸ ਲੀਹ ਤੇ ਚੱਲ ਕੇ ਬਾਦਲ ਨੂੰ ਭਜਾਇਆ ਨਹੀਂ ਜਾ ਸਕਦਾ , ਬਲਕਿ ਉਸ ਦੀ ਜਿੱਤ ਹੋਰ ਪੱਕੀ ਕੀਤੀ ਜਾ ਸਕਦੀ ਹੈ ।
  ਇਸ ਲਈ ਪ੍ਰਿੰਸੀਪਲ ਸਾਹਿਬ ਨੂੰ ਆਪਣੇ ਬਿਆਨ ਤੇ ਮੁੜ ਵਿਚਾਰ ਕਰਨ ਦੀ ਅਪੀਲ ਹੀ ਕੀਤੀ ਜਾ ਸਕਦੀ ਹੈ ।
                                          ਅਮਰ ਜੀਤ ਸਿੰਘ ਚੰਦੀ 
                                             ੨੭-੫-੨੦੧੪