ਜਲੰਧਰ ‘ਚ ਅਮਰੀਕਨ ਔਰਤ ਨਾਲ ਲੁੱਟ-ਖੋਹ
ਜਲੰਧਰ, 25 ਨਵੰਬਰ (ਪੰਜਾਬ ਮੇਲ)– ਟੈਗੋਰ ਨਗਰ ਵਿਚ ਸਕੂਟੀ ‘ਤੇ ਆਇਆ ਲੁਟੇਰਾ ਸ਼ਰੇਆਮ 60 ਸਾਲ ਦੀ ਅਮਰੀਕਨ ਔਰਤ ਦਾ ਪਰਸ ਖੋਹ ਕੇ ਲੈ ਗਿਆ। ਪਰਸ ਵਿਚ ਸੋਨੇ ਅਤੇ ਹੀਰੇ ਦੇ ਗਹਿਣਿਆਂ ਦੇ ਨਾਲ ਨਾਲ ਤਿੰਨ ਸੌ ਡਾਲਰ, 8 ਹਜ਼ਾਰ ਦੀ ਭਾਰਤੀ ਕਰੰਸੀ ਅਤੇ ਹੋਰ ਸਮਾਨ ਸੀ। ਗਹਿਣਿਆਂ ਦੀ ਕੀਮਤ 7 ਲੱਖ ਰੁਪਏ ਤੋਂ ਜ਼ਿਆਦਾ ਦੱਸੀ ਗਈ ਹੈ।
ਥਾਣਾ ਡਵੀਜ਼ਨ ਨੰਬਰ ਦੋ ਦੇ ਐਸਐਚਓ ਪ੍ਰੇਮ ਕੁਮਾਰ ਦਾ ਕਹਿਣਾ ਹੈ ਕਿ ਕੇਸ ਦਰਜ ਕਰਕੇ ਲੁਟੇਰੇ ਦੀ ਭਾਲ ਕੀਤੀ ਜਾ ਰਹੀ ਹੈ। ਪੁਲਿਸ ਨੂੰ ਸੀਸੀਟੀਵੀ ਕੈਮਰੇ ਤੋਂ ਲੁਟੇਰੇ ਦੀ ਫ਼ੋਟੋ ਮਿਲੀ ਹੈ। ਅਮਰੀਕਾ ਵਿਚ ਰਹਿੰਦੀ 60 ਸਾਲ ਦੀ ਮਧੂ ਸ਼ੇਖੜੀ ਨੇ ਦੱਸਿਆ ਕਿ ਟੈਗੋਰ ਨਗਰ ਵਿਚ ਉਸ ਦੇ ਜੀਜਾ ਸੁਰਿੰਦਰ ਪਾਲ ਅਤੇ ਭੈਣ ਨਿਸ਼ਾ ਰਹਿੰਦੀ ਹੈ। ਉਹ ਉਨ੍ਹਾਂ ਮਿਲਣ ਦੇ ਭਾਰਤ ਆਈ ਸੀ। ਬੁਧਵਾਰ ਸ਼ਾਮ ਨੂੰ ਮਾਡਲ ਟਾਊਨ ਤੋਂ ਸ਼ਾਪਿੰਗ ਕਰਕੇ ਰਿਕਸ਼ੇ ‘ਤੇ ਘਰ ਪਰਤ ਰਹੀ ਸੀ। ਤਦ ਟੈਗੋਰ ਨਗਰ ਦੀ ਗਲੀ ਨੰਬਰ ਤਿੰਨ ਵਿਚ ਰਿਕਸ਼ਾ ਪੁੱਜੀ ਤਾਂ ਪਿੱਛੇ ਤੋਂ ਸਕੂਟੀ ‘ਤੇ ਆਏ ਲੁਟੇਰੇ ਨੇ ਉਨ੍ਹਾਂ ਦਾ ਪਰਸ ਖੋਹ ਲਿਆ। ਮਧੂ ਨੇ ਰੌਲਾ ਪਾਇਆ ਪ੍ਰੰਤੂ ਲੁਟੇਰਾ ਤੇਜ਼ੀ ਨਾਲ ਨਿਕਲ ਗਿਆ। ਮਧੂ ਨੇ ਲੁੱਟ ਦੇ ਬਾਰੇ ਤੁਰੰਤ ਜੀਜਾ ਸੁਰਿੰਦਰ ਪਾਲ ਨੂੰ ਦੱਸਿਆ, ਉਨ੍ਹਾਂ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ।