Introduction: ਸੰਸਾਰਕ ਸਫਲਤਾ ਨਾਲ ਸਬੰਧਤ ਇਕ ਨਵੀਂ ਵਿਚਾਰ ਪੁੰਗਰੀ ਹੈ। ਕਈ ਸ਼ਰਧਾਲੂ ਗੁਰਮਤਿ ਨੂੰ ਵਖਰੇ ਸੁਤੰਤਰ ਰਾਜ ਸਥਾਪਨਾ ਦੀ ਮੁਦੱਈ ਪਰਚਾਰਦੇ ਹਨ। ਗੁਰਮਤਿ ਵਿਚ ਮਨੁਖਾਂ ਲਈ ਬਰਾਬਰਤਾ, ਸੁਤੰਤਰਤਾ, ਹਲੀਮੀ, ਭਾਈਵਾਲਤਾ, ਸਹਿਜ, ਨੈਤਕ ਜੀਵਨ, ਨਿਰਵੈਰਤਾ ਅਤੇ ਸੇਵਾ ਦਾ ਉਪਦੇਸ਼ ਹੈ ਰਾਜ ਸਥਾਪਤ ਕਰਨ ਦਾ ਨਹੀਂ। ਗੁਰਬਾਣੀ ਮਨ ਨੂੰ ਸਾਧ ਕੇ ਸੰਸਾਰ ਨੂੰ ਬੇਗਮਪੁਰਾ ਬਨਾਉਣ ਦਾ ਅਨੁਰੋਧ ਕਰਦੀ ਹੈ ਸੰਸਾਰ ਵਿਚ ਆਪਣਾ ਰਾਜ ਸਥਾਪਤ ਕਰਨ ਦੀ ਹਾਮੀ ਨਹੀਂ ਹੈ। ਰਾਜ ਕਰਨਾ ਇਕ ਕਿੱਤਾ ਹੈ ਗੁਰਬਾਣੀ ਕਿਸੇ ਕਿੱਤੇ ਦੀ ਸਿਖਿਆ ਨਹੀਂ ਦਿੰਦੀ ਅਤੇ ਨਾ ਹੀ ਕਿਸੇ ਕਿੱਤੇ ਨੂੰ ਵਡਿਆਉਂਦੀ ਹੈ। ਗੁਰਬਾਣੀ ਤੇ ਹਰ ਇਕ ਮਨੁੱਖ ਨੂੰ ਆਪਣਾ ਕਿੱਤਾ ਚੁਨਣ ਅਤੇ ਉਸ ਨੂੰ ਦਿਆਨਤਦਾਰੀ ਨਾਲ ਨਿਭਾਉਣ ਨੂੰ ਧਰਮ ਦੀ ਕਿਰਤ ਦੱਸਦੀ ਹੈ। ਗੁਰਮਤਿ ਹਰ ਪਰਕਾਰ ਦੇ ਸਾਸ਼ਨ ਵਿਚ ਅਨਿਆਂ ਦਾ ਵਿਰੋਧ ਕਰਦੀ ਹੈ ਸਾਸ਼ਨ ਦਾ ਨਹੀਂ। ਗੁਰਬਾਣੀ ਸਚਿਆਰਾ, ਨਿਰਹੰਕਾਰਾ ਅਤੇ ਪਰਉਪਕਾਰੀ ਜੀਵਨ ਜਿਊਣ ਦਾ ਉਪਦੇਸ਼ ਕਰਦੀ ਹੈ ਨਾ ਕਿ ਲੋਕਾਂ ਤੇ ਰਾਜ ਕਰਨ ਦਾ। ਹਾਂ, ਮਨੁਖੀ ਬਰਾਬਰਤਾ ਅਤੇ ਸੁਤੰਤਰਤਾ ਲਈ ਸੰਘਰਸ਼ ਕਰਨਾ ਹਰ ਵਿਅਕਤੀ ਦਾ ਅਧਿਕਾਰ ਹੈ, ਪਰ ਮਨੁੱਖੀ ਬਰਾਬਰਤਾ ਅਤੇ ਸੁਤੰਤਰਤਾ ਲਈ ਵਖਰੇ ਰਾਜ ਦੀ ਸਥਾਪਨਾ ਜ਼ਰੂਰੀ ਨਹੀਂ ਹੁੰਦੀ, ਉਸ ਲਈ ਤੇ ਕੇਵਲ ਨਿਰਪੱਖ ਕਨੂੰਨ ਦੀ ਪਾਬੰਦੀ ਲੋੜੀਂਦੀ ਹੈ।