ਵਾਸ਼ਿੰਗਟਨ, 1 ਫਰਵਰੀ (ਪੰਜਾਬ ਮੇਲ)- ਮੁੱਖ ਮੰਤਰੀ ਕੇਜਰੀਵਾਲ ਨੂੰ ਜਾਨ ਤੋਂ ਮਾਰਨ ਦੀਆਂ ਧਮਕੀਆਂ ਦੇਣ ਵਾਲੇ ਮੁਲਜ਼ਮ ਦੀ ਪਛਾਣ ਵਿਨੀਜ਼ ਗੁਲਾਟੀ ਦੇ ਰੂਪ ‘ਚ ਹੋਈ ਹੈ। ਪ੍ਰਾਪਰਟੀ ਵਿਵਾਦ ਦੇ ਚੱਲਦੇ ਚਾਚਾ ਨੂੰ ਫਸਾਉਣ ਲਈ ਉਸਨੇ ਕੈਲੀਫੋਰਨੀਆ ਦੀ ਇਕ ਟਰੈਵਲ ਏਜੰਸੀ ਤੋਂ ਇਹ ਫੋਨ ਕੀਤਾ ਸੀ। ਮੁਲਜ਼ਮ ਇਸੇ ਏਜੰਸੀ ‘ਚ ਚਾਲਕ ਹੈ। ਸਪੈਸ਼ਲ ਸੈੱਲ ਨੂੰ ਈਮੇਲ ਭੇਜ ਕੇ ਮੁਲਜ਼ਮ ਨੂੰ ਭਾਰਤ ਭੇਜਣ ਲਈ ਕਿਹਾ ਗਿਆ ਹੈ। ਇਸ ਮਾਮਲੇ ‘ਚ ਵਿਦੇਸ਼ ਮੰਤਰਾਲਾ ਦਾ ਵੀ ਸਹਿਯੋਗ ਲਿਆ ਜਾ ਰਿਹਾ ਹੈ।
ਪੁਲਿਸ ਦੇ ਮੁਤਾਬਕ, ਵਿਨੀਜ਼ ਗੁਲਾਟੀ 12 ਸਾਲ ਤੋਂ ਕੈਲੀਫੋਰਨੀਆ (ਅਮਰੀਕਾ) ‘ਚ ਆਪਣੀ ਮਾਂ ਦੇ ਨਾਲ ਰਹਿੰਦਾ ਸੀ। ਹਾਲਾਂਕਿ, ਮੂਲ ਰੂਪ ਵਿਚ ਉਹ ਪਾਕਿਸਤਾਨ ਦੇ ਰਾਵਲਪਿੰਡੀ ਦਾ ਰਹਿਣ ਵਾਲਾ ਹੈ। ਕਈ ਸਾਲ ਪਹਿਲਾਂ ਉਸਦੇ ਪਿਤਾ ਦਿੱਲੀ ਆ ਕੇ ਵੱਸ ਗਏ ਸਨ। ਇਥੇ ਸੁਭਾਸ਼ ਨਗਰ ‘ਚ ਉਸਦੇ ਪਿਤਾ ਦੇ ਨਾਮ ‘ਤੇ ਪ੍ਰਾਪਰਟੀ ਹੈ। ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਚਾਚਾ ਮੁਕੇਸ਼ ਗੁਲਾਟੀ ਉਰਫ ਭੋਲਾ ਨਾਲ ਮਕਾਨ ‘ਚ ਹਿੱਸੇਦਾਰੀ ਨੂੰ ਲੈ ਕੇ ਉਸਦਾ ਝਗੜਾ ਚੱਲ ਰਿਹਾ ਹੈ, ਜੋ ਕਿ ਸੁਭਾਸ਼ ਨਗਰ ‘ਚ ਵਿਕਾਸ ਟੈਂਟ ਹਾਊਸ ਚਲਾਉਂਦੇ ਹਨ। 21 ਜਨਵਰੀ ਨੂੰ ਵੀ ਫੋਨ ‘ਤੇ ਵਿਨੀਜ਼ ਤੇ ਭੋਲਾ ਦੇ ਵਿਚਕਾਰ ਝਗੜਾ ਹੋਇਆ ਸੀ।
ਕੇਜਰੀਵਾਲ ਨੂੰ ਸਿਵਲ ਲਾਈਨਸ ਸਥਿਤ ਆਵਾਸ ਦੇ ਲੈਂਡਲਾਈਨ ‘ਤੇ 10.45 ਵਜੇ ਫੋਨ ਕਰ ਕੇ ਕਿਹਾ ਕਿ ਸੁਭਾਸ਼ ਨਗਰ ‘ਚ ਵਿਕਾਸ ਟੈਂਟ ਹਾਊਸ ਚਲਾਉਣ ਵਾਲਾ ਭੋਲਾ ਨਾਂ ਦਾ ਵਿਅਕਤੀ ਮੁੱਖ ਮੰਤਰੀ ‘ਤੇ ਹਮਲਾ ਕਰ ਸਕਦਾ ਹੈ। ਇਸ ਤੋਂ ਅਲਰਟ ਹੋਏ ਸੁਰੱਖਿਆ ਕਰਮੀਆਂ ਨੇ ਭੋਲਾ ਨੂੰ ਹਿਰਾਸਤ ‘ਚ ਲੈ ਲਿਆ।
   ਪੁਲਿਸ ਨੇ ਭੋਲਾ ਕੋਲੋਂ ਘੰਟਿਆਂਬੱਧੀ ਪੁੱਛਗਿੱਛ ਕੀਤੀ ਪਰ ਉਸਦੀ ਗਲਤੀ ਨਹੀਂ ਪਾਈ ਗਈ। ਜਾਂਚ ‘ਚ ਪਤਾ ਲੱਗਿਆ ਕਿ ਭੋਲਾ ਨੂੰ ਫਸਾਉਣ ਲਈ ਉਸ ਦੇ ਭਤੀਜੇ ਨੇ ਕੈਲੀਫੋਰਨੀਆ ਸਥਿਤ ਟ੍ਰੈਵਲ ਏਜੰਸੀ ਤੋਂ ਕਾਲ ਕੀਤੀ ਸੀ। ਇਸ ਤੋਂ ਬਾਅਦ ਭੋਲਾ ਨੂੰ ਛੱਡ ਦਿੱਤਾ ਗਿਆ ਤੇ ਵਿਨੀਜ਼ ਦੇ ਖ਼ਿਲਾਫ ਮਾਮਲਾ ਦਰਜ ਕਰਵਾ ਦਿੱਤਾ ਗਿਆ। ਬਾਅਦ ‘ਚ ਕੇਸ ਨੂੰ ਸਪੈਸ਼ਲ ਸੈੱਲ ‘ਚ ਟਰਾਂਸਫਰ ਕਰ ਦਿੱਤਾ ਗਿਆ।