ਕਵਿਤਾਵਾਂ
ਸੰਤ ਤੋਂ ਸਿੱਖ !!
Page Visitors: 2557
ਸੰਤ ਤੋਂ ਸਿੱਖ !!
ਜਦ ਤੋਂ ਉਸਨੇ ਸ਼ਬਦ ਦਾ ਲੰਗਰ ਲਾਇਆ ਹੈ ,
ਸੰਪਰਦਾਈਆਂ ਦੇ ਉਹ ਹਜ਼ਮ ਨਹੀਂ ਆਇਆ ਹੈ ।
ਸੰਤ-ਮਾਰਗੀ ਤਦ ਤੋਂ ਡਾਢੇ ਔਖੇ ਨੇ,
ਨਾਮ ਉਹਨਾ ਦਾ ਜਦ ਤੋਂ ਨਾਮੋਂ ਲਾਹਿਆ ਹੈ ।
ਜਦ ਤੋਂ ਬਣਿਆਂ ਪੁੱਤ ਭਰਾ ਉਹ ਸੰਗਤ ਦਾ,
ਡੇਰੇਦਾਰ ਦਿਲੋਂ ਉਸਤੋਂ ਘਬਰਾਇਆ ਹੈ ।
ਅੱਜ ਵੀ ਉਹ ਤਾਂ ਸੰਤ ਕਹਿਣ ਤੋਂ ਹੱਟਦੇ ਨਾ,
ਸੰਤ-ਬਾਦ ਦਾ ਪੈ ਗਿਆ ਜਿੱਥੇ ਸਾਇਆ ਹੈ ।
ਬਚਪਨ ਵਿੱਚ ਸੰਗਤ ਨਾਲ ਐਸਾ ਜੁੜਿਆ ਉਹ,
ਜੋ ਪਰਚੱਲਤ ਸੁਣਿਆਂ ਅੱਗੇ ਸੁਣਾਇਆ ਹੈ ।
ਗੁਰਮਤਿ ਦੇ ਪ੍ਰਚਾਰ `ਚ ਵੱਡਾ ਫਰਕ ਪਿਆ,
ਗੁਰ-ਸਿਧਾਂਤ ਨੂੰ ਜਦੋਂ ਆਧਾਰ ਬਣਾਇਆ ਹੈ ।
ਗੈਰ-ਕੁਦਰਤੀ ਗੱਲਾਂ ਸਿੱਧੀਆਂ ਹੋਈਆਂ ਸਭ,
ਗੁਰਮਤਿ ਦੀ ਕਸਵੱਟੀ ਤੇ ਜਦ ਲਾਇਆ ਹੈ ।
ਡੇਰੇਦਾਰਾਂ ਨੇ ਸਭ ਹਰਭੇ ਵਰਤੇ ਨੇ,
ਜਦ ਤੋਂ ਝੰਡਾ ਗੁਰਮਤਿ ਦਾ ਲਹਿਰਾਇਆ ਹੈ ।
ਸਿੱਖ ਤੋਂ ਸੰਤ ਬਥੇਰੇ ਬਣਦੇ ਦੇਖੇ ਨੇ,
ਪਰ ਉਸ ਸੰਤੋਂ ਸਿੱਖ ਬਣਕੇ ਦਿਖਲਾਇਆ ਹੈ ।
ਗੁਰਮੀਤ ਸਿੰਘ ਬਰਸਾਲ (ਕੈਲੇਫੋਰਨੀਆਂ)