ਯੂਨੀਅਨ ਗਈ ਨਾ ਘਰ ਸਾਂਝਾ ਰਹਿਣਾ

ਯੂਰਪੀਨਾਂ ਕੀਤੇ ਨੇ ਹੱਥ ਜੋ ਕਰਾਰੇ
ਸਾਨੂੰ ਦਿਖਾ ਦਿਤੇ ਦਿਨ ਦੀਵੀ ਤਾਰੇ

ਰੈਫਰੈਂਡਮ ਕਾਹਦਾ ਨਿਰੀ ਮੌਤ ਜਾਪੇ
ਪਤਾ ਨਹੀਂ ਸੀ ਏਨੇ ਪੈ ਜਾਣੇ ਖਿਲਾਰੇ

ਸਵਾਲਾਂ ਦੇ ਹੋ ਗਏ ਜਵਾਬ ਔਖੇ ਦੇਣੇ
ਪੀ ਐਮ ਡੇਵਡ ਮੱਥੇ ਹੱਥ ਮਾਰੇ

ਕਦੀ ਨਹੀਂਓਂ ਗੁੱਡੀ ਸਦਾ ਚੜ੍ਹੀ ਰਹਿੰਦੀ
ਕਲ੍ਹ ਦੇ ਸੀ ਸਾਹਬ ਜੋ ਹੋ ਗਏ ਵਿਚਾਰੇ

ਸੂਰਜ ਫਿਰੰਗੀਆਂ ਜਦੋਂ ਸਿਰ ਚੜ੍ਹਿਆ
ਕਿਹਦੀ ਮਜਾਲ ਸੀ ਜੋ ਉਹਨੂੰ ਉਤਾਰੇ

ਯੂਨੀਅਨ ਗਈ ਨਾ ਘਰ ਸਾਂਝਾ ਰਹਿਣਾ
ਸਕੌਟਿਸ਼ਾਂ ਪਹਿਲਾਂ ਹੀ ਕੀਤੇ ਤਿਆਰੇ

ਯੂ ਕੇ ਦੀ ਬੇੜੀ ਨੂੰ ਖ਼ਤਰੇ ਤੇ ਖ਼ਤਰੇ
ਅੱਤਵਾਦੀ ਪੈ ਰਹੇ ਪੱਥਰ ਜੋ ਭਾਰੇ

ਖਬਰਾਂ ਰੋਜ਼ਾਨਾ ਦੁਹਾਈ ਮਚਾਵਣ
ਜੁੱਲੀ ਚੁੱਕਾਂ ਅੱਜ ਨਹੀਂ ਭਲਕੇ ਹਾਂ ਮਾਰੇ

ਹੁਣ ਨਾ ਡਿਬੇਟਾਂ ਦਾ ਕੋਈ ਮਜ਼ਾ ਆਵੇ
ਲਹਿੰਦੇ ਨਹੀਂਓਂ ਚੜ੍ਹ ਜਾਂਦੇ ਨੇ ਪਾਰੇ

ਵੱਖਵਾਦੀ, ਪੱਖਪਾਤੀ ਲੱਗੇ ਨੇ ਘੂਰਨ
ਥੱਲੇ ਉਤਾਰਾਂਗੇ ਜੋ ਚੜ੍ਹੇ ਨੇ ਚੁਬਾਰੇ

ਹਾੜੇ ਵਪਾਰੀ ਦੇ ਸੁਣਦਾ ਨਾ ਕੋਈ
ਮੰਡੀ ਦੇ ਤੇਵਰ ਵੀ ਹੋਏ ਕਰਾਰੇ

ਜਦੋਂ ਹਿੱਤ ਭਿੜਦੇ ਤਦੋਂ ਜੰਗ ਹੁੰਦੀ
‘ਢੇਸੀ’ ਜੀ ਕਿਹਨੂੰ ਨੇ ਲੱਗਣੇ ਪਿਆਰੇ

Kulwant Singh Dhesi—07854 136 413