ਨਿਊਯਾਰਕ, 18 ਜਨਵਰੀ (ਪੰਜਾਬ ਮੇਲ)- ਚਰਚਿਤ ਭਾਰਤੀ ਅਮਰੀਕੀ ਵਕੀਲ ਗੁਰਬੀਰ ਐਸ ਗਰੇਵਾਲ ਨੂੰ ਅਮਰੀਕਾ ਦੇ ਨਿਊਜਰਸੀ ਸੂਬੇ ਦਾ ਪਹਿਲਾ ਸਿੱਖ ਅਟਾਰਨੀ ਜਨਰਲ ਬਣਾਇਆ ਗਿਆ ਹੈ। ਸੂਬੇ ਦੇ ਸੈਨੇਟ ਨੇ ਸਰਵਸੰਮਤੀ ਨਾਲ ਉਨ੍ਹਾਂ ਦੇ ਨਾਂ ਨੂੰ ਇਸ ਅਹੁਦੇ ਲਈ ਮਨਜ਼ੂਰੀ ਦਿੱਤੀ। ਗਰੇਵਾਲ (44) ਨੇ ਮੰਗਲਵਾਰ ਨੂੰ ਸੈਨੇਟ ਨਿਆਂ ਕਮੇਟੀ ਦੇ ਸਾਹਮਣੇ ਕਿਹਾ, ‘ਮੈਂ ਕਦੇ ਕਲਪਨਾ ਨਹੀਂ ਕੀਤੀ ਸੀ ਕਿ ਮੇਰੀ ਜ਼ਿੰਦਗੀ ਦੀ ਯਾਤਰਾ ਮੈਨੂੰ ਅੱਜ ਇੱਥੇ ਲਿਆ ਸਕਦੀ ਹੈ।’ ਉਨ੍ਹਾਂ ਕਿਹਾ, ‘ਮੈਂ ਆਪਣਾ ਕੰਮ ਕਰਨ ਨੂੰ ਲੈ ਕੇ ਬਹੁਤ ਉਤਸ਼ਾਹਿਤ ਹਾਂ ਅਤੇ ਮੇਰਾ ਪਹਿਲਾ ਕੰਮ ਖੁੱਦ ਨੂੰ ਅੱਗੇ ਰੱਖ ਕੇ ਰਫਤਾਰ ਫੜਨਾ ਹੈ’। ਇਕ ਖਬਰ ਮੁਤਾਬਕ ਉਹ ਕਿਸੇ ਸੂਬੇ ਦੇ ਪਹਿਲੇ ਸਿੱਖ ਅਟਾਰਨੀ ਜਨਰਲ ਬਣੇ ਹਨ। ਸੈਨੇਟ ਨੇ 29.0 ਦੀਆਂ ਵੋਟਾਂ ਨਾਲ ਉਨ੍ਹਾਂ ਦੇ ਨਾਂ ਨੂੰ ਮਨਜ਼ੂਰੀ ਦਿੱਤੀ। ਬਾਅਦ ਵਿਚ ਉਨ੍ਹਾਂ ਨੇ ਇਕ ਨਿੱਜੀ ਸਮਾਰੋਹ ਵਿਚ ਇਸ ਅਹੁਦੇ ਦੀ ਸਹੁੰ ਚੁੱਕੀ।