ਕਵਿਤਾਵਾਂ
ਰੁੱਖ ਦਾ ਦੁੱਖ ....
Page Visitors: 2636
ਰੁੱਖ ਦਾ ਦੁੱਖ ....
ਬੜਾ ਹੀ ਦੁਖਦਾਈ ਹੁੰਦੈ
ਰੁੱਖ ਦੇ ਮਜ਼ਬੂਤ ਤਣੇ ਦਾ
ਟਾਹਣੀਆਂ ਨਾਲੋਂ ਵਿਛੜਨਾ,
ਤਣਾ ਜੀਹਨੇ ਖਾਧ-ਖ਼ੁਰਾਕ ਪਹੁੰਚਾ ਕੇ
ਉਨ੍ਹਾਂ ਨੂੰ ਠੰਢੀਆਂ ਛਾਵਾਂ ਦੇਣ ਦੇ
ਯੋਗ ਬਣਾਇਆ ਹੁੰਦੈ।
ਪਰ ਸਮੇਂ ਦਾ ਅਦਿੱਖ-ਕੀੜਾ
ਜਦ ਉਸ ਨੂੰ ਖੋਖਲਾ ਕਰ ਦਿੰਦੈ
ਤਾਂ ਓਹੀ ਮਜ਼ਬੂਤ ਤਣਾ
ਮਜਬੂਰਨ ਢਹਿ-ਢੇਰੀ ਹੋ ਜਾਂਦੈ,
ਟਾਹਣੀਆਂ ਨੂੰ ਵਿਲਕਦੀਆਂ ਛੱਡ ਕੇ।
ਇਹ ਸਮੇਂ ਦੀ ਤ੍ਰਾਸਦੀ ਨਹੀਂ ਤਾਂ ਹੋਰ ਕੀ ਏ ?
ਸਾਲ ਪਹਿਲਾਂ ਉਹ ਰੁੱਖ ਹਰਾ-ਭਰਾ ਸੀ
ਸਾਥੀ-ਰੁੱਖ ਦੇ ਡਿੱਗਣ ਪਿੱਛੋਂ,ਲੜਖੜਾਉਣ ਲੱਗਾ,
ਬੇ-ਆਸਰਾ ਜਿਹਾ ਹੋ ਗਿਆ।
ਤੇ ਹੌਲੀ-ਹੌਲੀ ਸਮੇਂ ਨੇ
ਆਪਣਾ ਰੰਗ ਵਿਖਾਇਆ
ਤਾਂ ਉਹ ਢਹਿ -ਢੇਰੀ ਹੋ ਗਿਆ।
ਸਮਾਂ ਸੱਚਮੁੱਚ ਬੜਾ ਬਲਵਾਨ ਏ
ਜੋ ਮਜ਼ਬੂਤ ਰੁੱਖਾਂ ਨੂੰ ਵੀ ਨਹੀਂ ਬਖ਼ਸ਼ਦਾ
ਤੇ ਆਪਣੇ ਕਲਾਵੇ ਵਿੱਚ ਲੈ ਲੈਂਦਾ ਏ,
ਹੌਲੀ-ਹੌਲੀ, .......ਹੌਲੀ-ਹੌਲੀ।
ਡਾ. ਸੁਖਦੇਵ ਸਿੰਘ ਝੰਡ