ਕਵਿਤਾਵਾਂ
# ਆਮ-ਆਦਮੀ !!
Page Visitors: 2563
# ਆਮ-ਆਦਮੀ !!
ਕੂੜ-ਨੀਤੀ,ਬੇਈਮਾਨੀ,ਰਿਸ਼ਵਤਾਂ ਦੇ ਦੌਰ ਵਿੱਚ,
ਸੱਭੇ ਪਾਸੇ ਖੱਜਲ-ਖੁਆਰ ਆਮ ਆਦਮੀ ।
ਸੱਚ ਤੇ ਇਮਾਨਦਾਰੀ ਜਿੰਦਗੀ `ਚ ਜੀਣ ਵਾਲਾ,
ਦਿੱਤਾ ਜਾਂਦਾ ਸਦਾ ਦੁਰਕਾਰ ਆਮ ਆਦਮੀ ।
ਜਾਤ-ਪਾਤ,ਮਜਹਬਾਂ ਤੇ ਵਰਗਾਂ ਦੀ ਰਾਜਨੀਤੀ,
ਪਾੜ-ਪਾੜ ਕੀਤਾ ਹੈ ਲੰਗਾਰ ਆਮ ਆਦਮੀ ।
ਕਰਮਾਂ ਦੇ ਨਾਮ ਤੇ ਦਬਾਈ ਜਿਹੜੀ ਰੱਖਦੀ ਹੈ,
ਭਰਿਸ਼ਟਤਾ ਦਾ ਲੋਚਦਾ ਸੰਘਾਰ ਆਮ ਆਦਮੀ ।
ਲੁੱਟ-ਕੁੱਟ ਨਾਲ ਹਥਿਆਉਂਦੇ ਸਦਾ ਰਾਜ ਜਿਹੜੇ,
ਬਣਨਾ ਏਂ ਉਹਨਾ ਲਈ ਵੰਗਾਰ ਆਮ ਆਦਮੀ ।
ਬੁਝੀ ਹੋਈ ਰਾਖ ਨੇ ਵੀ ਭਾਂਬੜਾਂ `ਚ ਵਟ ਜਾਣਾ,
ਬਣਿਆ ਜਾ ਮਘਦਾ ਅੰਗਾਰ ਆਮ ਆਦਮੀ ।
ਜਿਸ ਰਾਜ-ਨੀਤੀ ਨੇ ਗੁਲਾਮ ਸੀ ਬਣਾਇਆ ਹੋਇਆ,
ਇੱਕ ਦਿਨ ਬਣੂਗਾ ਸ਼ੰਗਾਰ ਆਮ ਆਦਮੀ ।
ਲਗਦਾ ਸਥਾਪਤੀ ਨੂੰ ਥੁੱਕਣੇ ਲਈ ਤੁਰ ਚੁੱਕਾ,
ਸੰਘ `ਚ ਘੁਮਾ ਰਿਹਾ ਘੰਗਾਰ ਆਮ ਆਦਮੀ ।।
ਗੁਰਮੀਤ ਸਿੰਘ ਬਰਸਾਲ (ਕੈਲੇਫੋਰਨੀਆਂ)