ਭ੍ਰਿਸ਼ਟ ਹਾਕਮ ਸਬੰਧੀ 

ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ 

ਸੱਚ ਤੇ ਇਨਸਾਫ ਤੈਨੂੰ ਰਿੜਕਨਾਂ 

ਪਰਦੇ ‘ਤੇ ਬੇਸ਼ਕ ਮਨਾਂ ਨੂੰ ਮੋਹ ਲਵੇਂ

ਪਰ ਕਿਓਂ ਖੁਦਗਰਜ਼ ਸੀਮਾਂ ਤੇ ਰਹੇ

ਕਾਸ਼ ਐਸਾ ਹੋਵੇ ਨਾਂ ਤੇਰਾ ਸੁਭਾਅ...... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ

ਮੱਥੇ ਭਾਵੇਂ ਤਿਲਕ, ਗਲ ਕਿਰਪਾਨ ਹੈ

ਚੋਰੀ ਠੱਗੀ ਵਾਲਾ ਤਾਂ ਹੈਵਾਨ ਹੈ

ਰੱਬ ਦੇ ਨਾਂ ਤੇ ਹੀ ਸਹੀ ਕੁਝ ਸ਼ਰਮ ਖਾ..... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ 

ਦੇਸ਼ ਨੂੰ ਲੁੱਟ ਕੇ ਨੇ ਜਿਹੜੇ ਖਾ ਰਹੇ

ਰੀਤ ਨੇ ਹੈਵਾਨੀਅਤ ਦੀ ਪਾ ਰਹੇ

ਲਾਲੂ ਜਾਂ ਰਾਜੀਵ ਹੋਵੇ ਜਾਂ ਜਇਆ...... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ.

ਦੇਖ ਇੱਕ ਰੋਟੀ ਲਈ ਬੱਚੇ ਤਰਸਦੇ

ਚੋਰ ਰਿਸ਼ਵਤ ਖੋਰ ਨੇ ਸਭ ਹਵਸ ਦੇ

ਅੰਨ੍ਹੇ ਮੋਹ ਵਿਚ ਚੁੱਲ੍ਹੇ ਮਘਦੇ ਨਾ ਬੁਝਾ.... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ

ਕੁਦਰਤੀ ਰਹਿਮਤ ਹੈ ਭਾਰਤ ਦੇਸ਼ ਤੇ

ਪਰ ਇਹਦੇ ਉਤਪਾਦ ਨੂੰ ਜੋ ਵੇਚਦੇ

ਕਾਲੀ ਮੰਡੀ, ਕਾਲੇ ਦਿਲ ਫੈਲੀ ਵਬਾ.... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ 

ਸਵਿਸ ਬੈਂਕਾਂ ਤੋਂ ਕਦੇ ਪੁੱਛੇਂ ਹਿਸਾਬ

ਫਿਰ ਪਤਾ ਲੱਗੂ ਕਿ ਕੀ ਸੱਚ ਹੈ ਜਨਾਬ

ਕਿਰਤੀਆਂ ਦੇ ਮੂੰਹੋਂ ਕਿਓਂ ਖੋਂਹਨੈ ਗਿਰਾਹ...... ਹਾਕਮਾਂ ਤੂੰ ਕਾਹਦੇ ਲਈ ਰੋਨੈਂ ਪਿਐਂ

ਧਰਮ ‘ਤੇ ਇਤਹਾਸ ਪਿੱਛੇ ਨਿੱਝ ਹੈ

ਸੂਬੇ ਦਰ ਸੂਬੇ ‘ਚ ਏਹੋ ਬਿੱਜ ਹੈ

ਨਿੱਝ ਨੂੰ ਹਟਾ, ਸਾਂਝਾ ਬਣਾ ਤੇ ਜੂਝ ਜਾ.... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ

‘ਢੇਸੀ’ ਦੀ ਕਿਸਮਤ ਦੇ ਵਿਚ ਪ੍ਰਵਾਸ ਹੈ

ਛੱਡ ਕੇ ਰਣ ਜਾਣ ਦਾ ਅਹਿਸਾਸ ਹੈ

ਚੰਗਾ ਹੈ ਕਿ ਕਹਿੰਦਾ ਨਹੀਂ ਜਾਣੇ ਬਲਾ..... ਹਾਕਮਾਂ ਤੂੰ ਦੇਖ ਕੀ ਕਰਨੈਂ ਪਿਐਂ

2nd October 2014 

ਤਾਮਿਲਨਾਡੂ ਦੀ ਮੁਖ ਮੰਤ੍ਰੀ ਜੈ ਲਲਿਤਾ ਨੂੰ ਕੁਰੱਪਸ਼ਨ ਸਬੰਧੀ ਚਾਰ ਸਾਲ ਦੀ ਕੈਦ ਅਤੇ ਸੌ ਕਰੋੜ ਰੁਪਏ ਦਾ ਜੁਰਮਾਨਾਂ ਹੋਣ ਤੇ........

ਕੁਲਵੰਤ ਸਿੰਘ ਢੇਸੀ