ਲੀਬੀਆ ਦਾ ਦੁਖਾਂਤ
ਖਾਨਾ ਜੰਗੀ ਜਦੋਂ ਵੀ ਲੱਗੀ ਦੇਸ਼ਾਂ ਵਿਚ
ਇੱਲ੍ਹਾਂ ਆਈਆਂ ਵੱਖੋ ਵੱਖਰੇ ਭੇਸਾਂ ਵਿਚ
ਤਾਨਾਸ਼ਾਹ ਜੇ ਕੋਈ ਹੱਡੀਂ ਬਹਿ ਜਾਵੇ
ਸੀਰੀਆ ਵਰਗਾ ਦੇਸ਼ ਉਜਾੜੇ ਪੈ ਜਾਵੇ
ਆਪੋ ਧਾਪੀ ਪੈ ਜਾਂਦੀ ਹੈ ਸਾਰੇ ਹੀ
ਕੱਟੜਪੰਥੀਆਂ ਨੇ ਸਾਰੇ ਹੀ ਮਾਰੇ ਜੀ
ਇੱਕ ਦੂਜੇ ਦੀ ਛਾਤੀ ਪੰਜਾ ਖੋਭਣ ਉਹ
ਡੁੱਬ ਰਿਹਾਂ ਨੂੰ ਫੜ ਫੜ ਕੇ ਉਹ ਡੋਬਣ ਉਹ
ਪੱਤਣ ‘ਤੇ ਜਾਂ ਦੇਖੀ ਲਾਸ਼ ਸੀ ਬੱਚੇ ਦੀ
ਯੂਰਪ ਦੇ ਲੋਕਾਂ ਦੇ ਹਿਰਦੇ ਮੱਚੇ ਸੀ
ਪਨਾਹਗੀਰਾਂ ਦਾ ਮੁੱਦਾ ਭਖਿਆ ਸਾਡੇ ਵੀ
ਪਿਘਲ ਗਏ ਦਿਲ ਜੋ ਬਹੁਤੇ ਹੀ ਡਾਢੇ ਜੀ
ਡੇਵਡ ਕੈਮਰਨ ਕਹਿੰਦਾ ਕਰਦੇ ਚਾਰਾ ਜੀ
ਸਾਡਾ ਤਾਂ ਪਹਿਲਾਂ ਹੀ ਪੱਲਾ ਭਾਰਾ ਜੀ
ਬਿਲੀਅਨ ਪੌਂਡ ਉਹ ਕਹਿੰਦਾ ਅਸੀਂ ਹਾਂ ਦੇ ਚੁੱਕੇ
ਦੁਖੀਆਂ ਦੇ ਦੁਖ ਰਤੀ ਵੀ ਕਹਿੰਦਾ ਨਾ ਮੁੱਕੇ
ਕੇਵਲ ਜਰਮਨ ਨੇ ਹੀ ਬਾਹਾਂ ਫੜੀਆਂ ਨੇ
ਬਾਕੀ ਯੂਰਪ ਦੀਆਂ ਤਾਂ ਨਬਜ਼ਾਂ ਠਰੀਆ ਨੇ
ਹੰਗਰੀ ਕਹਿੰਦਾ ਮੁਸਲਮਾਨ ਨਾ ਆਵੇ ਜੀ
ਸੁੱਖੀਂ ਲੱਧਾ ਘਰ ਨਾ ਸਾਡਾ ਢਾਵੇ ਜੀ
ਹਾਲੇ ਵੀ ਜਿਹਾਦੀ ਬਾਜ ਨਾ ਆਉਂਦੇ ਨੇ
ਯੂਰਪ ਨੂੰ ਉਹ ਨਿੱਤ ਈ ਬੜਾ ਡਰਾਉਂਦੇ ਨੇ
ਹਮਲੇ ਏਸੇ ਲਈ ਹੁੰਦੇ ਮੁਸਲਮਾਨਾ ਤੇ
ਉਹਨਾ ਭੁਲੇਖੇ ਸਿੱਖਾਂ ਜਏ ਇਨਸਾਨਾਂ ਤੇ
ਚੰਗੀ ਜ਼ਾਤ ਬਣਾਈ ਰੱਬਾ ਬੰਦੇ ਦੀ
ਤੇਰੇ ਨਾਂ ਤੇ ਹੋ ਗਏ ਬੰਦੇ ਗੰਦੇ ਜੀ
ਲੀਬੀਆ ਨੂੰ ਤੂੰ ਤੇਲ ਬਥੇਰਾ ਦੇ ਦਿੱਤਾ
ਜੰਗ ਬਾਜ਼ਾਂ ਦਾ ਤੇਜ਼ ਹੋ ਗਿਆ ਹੈ ਕਿੱਤਾ
ਯੂ ਐਸ, ਯੂ ਕੇ ਮਾਰ ਰਹੇ ਗੁੱਝੀ ਤਾੜੀ
ਥਾਣੇਦਾਰ ਤੇ ਮੁਣਸ਼ੀ ਦੀ ਹੈ ਇਹ ਯਾਰੀ
ਚਿੜੀਆਂ ਮੌਤ ਗੰਵਾਰਾਂ ਹਾਸੇ ਖਿੜਦੇ ਨੇ
ਮੂਰਖ ਲੋਕੀ ਮਜ਼੍ਹਬਾਂ ਦੇ ਨਾਂ ਭਿੜਦੇ ਨੇ
ਪਰ ਜੇ ਥਾਣੇਦਾਰ ਉਹਨਾ ਨੂੰ ਪਾੜੇ ਨਾ
ਜਨੂੰਨੀਆਂ ਤੋਂ ਵੱਧ ਲੋਕ ਹੋਰ ਕੋਈ ਮਾੜੇ ਨਾ
ਦੂਜੇ ਕਾਫਰ ਦਿਸਦੇ ਨੇ ਜਿਹਾਦੀ ਨੂੰ
ਸਬਕ ਤਾਂ ਦੇਣਾਂ ਪਊਗਾ ਏਸ ਫਸਾਦੀ ਨੂੰ
ਨਿੱਤ ਧਮਕੀਆਂ ਦਿੰਦੇ ਅਸੀਂ ਹਾਂ ਅੱਕੇ ਜੀ
ਪਨਾਹਗੀਰਾਂ ਵਿਚ ਬੰਬ ਕਹਿੰਦੇ ਨੇ ਧੱਕੇ ਜੀ
ਕਹਿੰਦੇ ਮੁਸਲਮ ਫੋਬੀਆ ਹੋ ਗਿਆ ਲੋਕਾਂ ਨੂੰ
ਇਹ ਨਹੀਂ ਕਹਿੰਦੇ ਛਾਂਗ ਰਹੇ ਨੇ ਜੋਕਾਂ ਨੂੰ
ਦੀਦਾਵਰਾਂ ਕਮਾਨ ਜੇ ਨਾ ਸੰਭਾਲੀ ਤਾਂ
ਉਹਨਾ ਦੇ ਪੱਲੇ ਰਹਿ ਜਾਣੀ ਕੰਗਾਲੀ ਹਾਂ
ਕੁਝ ਕੁ ਕੱਟੜਪੰਥੀਆਂ ਕਾਰਨ ਸਾਰੇ ਹੀ
ਹੋ ਜਾਂਦੇ ਬਦਨਾਮ ਐਵੇਂ ਵਿਚਾਰੇ ਜੀ
ਬੱਚਿਆਂ ਹੱਥੋਂ ਟੁੱਕਰ ਖੋਹਣਾਂ ਚੰਗਾ ਨਹੀਂ
ਮਗਰਮੱਛ ਦੇ ਹੰਝੂ ਰੋਣਾ ਚੰਗਾ ਨਹੀਂ
ਨਿਤ ਹੀ ਹੁੰਦਾ ਰਹਿੰਦਾ ਹੈ ਤਕਰਾਰ ਜਿਹਾ
ਬੈਂਕਾਂ ਕਾਰਪੋਰੇਟਾਂ ਦਾ ਵਿਓਪਾਰ ਜਿਹਾ
ਮੀਰ ਇਹਨਾ ਦੇ ਸਾਰੇ ਤਾਬਿਆਦਾਰ ਰਹੇ
ਇਹਨਾ ਕਾਰਨ ਹੀ ਲੋਕੀ ਆਵਾਜ਼ਾਰ ਰਹੇ
ਮਾਨਵਤਾ ਨੂੰ ਜਿਊਂਦੇ ਰੱਖਣਾ ਚਾਹੁੰਦੇ ਜੇ
ਬੇਵਜ਼ਾ ਹੀ ਚਿਹਰੇ ਕਿਓਂ ਛੁਪਾਉਂਦੇ ਜੇ
ਥੋੜਾ ਥੋੜਾ ਸਾਰੇ ਚਾਰਾ ਕਰ ਦੇਵੋ
ਜੋ ਵੀ ਬਣਦਾ ਉਹ ਹੀ ਹੱਥ ਤੇ ਧਰ ਦੇਵੋ
ਬੰਦੇ ਨੂੰ ਅਜੇ ਵੰਡ ਕੇ ਖਾਣਾ ਆਇਆ ਨਹੀਂ
ਗੁਰ ਪੀਰਾਂ ਦਾ ਹੁਕਮ ਇਹਨਾ ਨੂੰ ਭਾਇਆ ਨਹੀਂ
ਲੇਖਾ ਤਾਂ ਦੇਣਾ ਹੈ ਤਿਲ ਤਿਲ ਦਾ ਯਾਰੋ
ਐਵੇਂ ਨਾ ਮਾਸੂਮਾਂ ਨੂੰ ਨਿੱਤ ਹੀ ਮਾਰੋ
ਕਰੋ ਪਛਾਣ ਜਨੂੰਨੀ ਲੁਕੀਆਂ ਜੋਕਾਂ ਦੀ
ਤਾਹੀਓਂ ਮੁਕਤੀ ਹੋਣੀ ਸਾਰੇ ਲੋਕਾਂ ਦੀ
ਇੱਕੋ ਜਹੇ ਹੁੰਦੇ ਨੇ ਕੱਟੜ ਆਕੀ ਜੀ
ਇਹਨਾ ਦੀ ਬਿਹਤਰ ਹੈ ਮੰਜੀ ਠਾਕੀ ਜੀ
ਤਾਨਾਸ਼ਾਹਾਂ ਧਨ ਕੁਬੇਰਾਂ ਤੋਂ ਬਚਿਓ
ਇਹਨਾ ਤੇ ਕਿਸੇ ਹਾਲ ਵੀ ਯਾਰੋ ਨਾ ਧਜਿਓ
‘ਢੇਸੀ’ ਕੋਸ਼ਿਸ਼ ਕਰਦਾ ਹੈ ਸੱਚ ਕਹਿਣੇ ਦੀ
ਅਸੀਸ ਦਿਓ ਏਹਨੂੰ ਨਿਰਲੇਪ ਹੀ ਰਹਿਣੇ ਦੀ