# - ਅੱਜ ਦੀ ਸਾਚੀ ਸਾਖੀ - #
ਦਿਲਾਂ ‘ਚ ਹੋਏ ਪਿਆਰ ਤਾਂ ਗੱਲ ਬਣਦੀ ਏ
ਚੜ੍ਹਿਆ ਹੋਏ ਖੁਮਾਰ ਤਾਂ ਗੱਲ ਬਣਦੀ ਏ
ਮਾਸ ਫਿਰੋਸ਼ੀ ਮਤਲਬ ਖੋਰੀ ਦੀਆਂ ਚੋਜਾਂ
ਰੂਹਾਂ ਹੋਵਣ ਯਾਰ ਤਾਂ ਗੱਲ ਬਣਦੀ ਏ
ਮਸੰਦ ਮਸੀਹੇ ਰਾਜ ਧਰਮ ਤੇ ਹਾਵੀ ਨੇ
ਕਰ ਦਈਏ ਮੂੰਹ ਭਾਰ ਤਾਂ ਗੱਲ ਬਣਦੀ ਏ
ਸਾਵੇ ਪੱਤਰ ਤੂੰ ਦੇਖੇ, ਮੈਂ ਦੇਖੇ ਨੇ
ਹੋਈਏ ਜੇ ਸਰਸ਼ਾਰ ਤਾਂ ਗੱਲ ਬਣਦੀ ਏ
ਦੌਲਤ ਰੁਤਬਾ ਅਕਸਰ ਲੀਹੋਂ ਲਾਹ ਦਿੰਦੇ
ਹਾਜ਼ਰ ਰਹੇ ਸਰਕਾਰ ਤਾਂ ਗੱਲ ਬਣਦੀ ਏ
ਗਲਤੀ ਕਰ ਕੋਈ ਏਨਾ ਹੀ ਕਹਿ ਦੇਵੇ ਜੇ
ਬੰਦਾ ਭੁੱਲਣਹਾਰ ਤਾਂ ਗੱਲ ਬਣਦੀ ਏ
ਜ਼ਾਤ ਧਰਮ ਤੇ ਰੰਗਾਂ ਵਲ ਨੂੰ ਨਾ ਜਾਈਏ
ਗੁਣਾਂ ਦਾ ਹੋਏ ਮਿਆਰ ਤਾਂ ਗੱਲ ਬਣਦੀ ਏ
ਝੂਠ ਸਿਆਸਤ ਗੁਰੂ ਦੁਆਰੇ ਆ ਬੈਠੀ
ਸ਼ਰਮਾਂ ਦੀ ਹੋਏ ਮਾਰ ਤਾਂ ਗੱਲ ਬਣਦੀ ਏ
ਮੀਰੀ ਪੀਰੀ ਪ੍ਰੇਮ ਦਇਆ ਸੀ ਗੁਰੂਆਂ ਦੀ
ਹੋ ਜਾਵੇ ਇਜ਼ਹਾਰ ਤਾਂ ਗੱਲ ਬਣਦੀ ਏ
ਕਹਿਣ ਨੂੰ ਇੱਕੋ ਬਾਪੂ ਦੇ ਹੀ ਕਹਿੰਦੇ ਹਾ
ਕਰੀਏ ਜੇ ਇਤਬਾਰ ਤਾਂ ਗੱਲ ਬਣਦੀ ਏ
ਹਰ ਕੋਈ ਆਪੋ ਆਪਣਾ ਪੂਜ ਬਣਾ ਲੈਂਦਾ
ਨਾ ਆਈਏ ਵਿਚਕਾਰ ਤਾਂ ਗੱਲ ਬਣਦੀ ਏ
ਅੱਜ ਗੁਨਾਹ ਤੇ ਭਲਕੇ ਦੀ ਜੋ ਤੋਬਾ ਹੈ
ਹੋਵੇ ਬੰਦ ਉਧਾਰ ਤਾਂ ਗੱਲ ਬਣਦੀ ਏ
ਅਣਹੋਏ ਕਿੱਸੇ ਨੇ ਹੀ ਮੱਤ ਮਾਰੀ ਹੈ
ਟੁਰੀਏ ਹੌਲੇ ਭਾਰ ਤਾਂ ਗੱਲ ਬਣਦੀ ਏ
ਅੰਮ੍ਰਿਤ ਦੇ ਲਈ ਅੰਮ੍ਰਿਤ ਹੋਣਾ ਪੈਣਾ ਹੈ
ਜ਼ਰਾ ਨਾ ਹੋਵੇ ਗਾਰ ਤਾਂ ਗੱਲ ਬਣਦੀ ਏ
ਪਾਟੇ ਹੋਏ ਪੰਜਾਬੀ ਜੇ ਇੱਕ ਦੂਜੇ ਲਈ
ਲੈਂਦੇ ਬਾਹਾਂ ਪਸਾਰ ਤਾਂ ਗੱਲ ਬਣਦੀ ਏ
ਮੱਤ ਮਾਰਦੇ ਮਜ਼ਹਬ ਅਕਸਰ ਦੇਖੇ ਨੇ
ਉਤਰੇ ਜ਼ਰਾ ਬੁਖਾਰ ਤਾਂ ਗੱਲ ਬਣਦੀ ਏ
ਕੰਨਾਂ ਦਾ ਸੰਗੀਤ ਕਿਤੇ ਨਾ ਹੋਵੇ ਜੇ
ਮਾਇਆ ਦੀ ਟੁਣਕਾਰ ਤਾਂ ਗੱਲ ਬਣਦੀ ਏ
ਲੋਕ ਸੇਵਾ ਕਰ ਨੇਤਾ ਤੇ ਸਾਰੇ ਅਫਸਰ
ਹੋ ਜਾਂਦੇ ਸਰਦਾਰ ਤਾਂ ਗੱਲ ਬਣਦੀ ਏ
ਕਿਰਪਾ ਦੀ ਕਿਰਪਾਨ ਕਬੂਲੀ ਜਾਣੀ ਹੈ
ਨਾ ਹੋਵੇ ਤਲਵਾਰ ਤਾਂ ਗੱਲ ਬਣਨੀ ਏ
ਧੜਿਆਂ ਦੇ ਧੜਵਾਈ ਸਾਡੇ ਹਾਵੀ ਨੇ
‘ਢੇਸੀ’ ਆਵੇ ਬਾਹਰ ਤਾਂ ਗੱਲ ਬਣਦੀ ਏ